«Мемлекет қоғамның әлеуметтік жағдайы төмен топтарына – зейнеткерлерге, мүгедектерге, еңбекке жарамсыздарға, науқас балаларға және т.б. атаулы көмек үшін толық жауапкершілік алатын болады». «Қазақстан 250» Стратегиясында белгіленген міндетті жүзеге асыру үшін бірқатар қолға алынуда.  

Былтыр пилоттық режимде мемлекеттік қызметтердің сапасы мен қолжетімділігін арттыру мақсатында мүгедектігі бар азаматтардың әлеуметтік қызметтерді пайдалануға арналған aleumet.egov.kz порталы іске қосылған болатын. Жаңа порталды насихаттау, жұмыстарын таныстыру мақсатында Түркістан қаласында, Төле би, Келес, Түлкібас аудандарында тұрғындармен кездесу ұйымдастырылып, порталдың жұмыс барысы қадағаланды.

Жүйе техникалық оңалту құралдарының 24 түріне және мемлекеттік мекемелерде арнайы әлеуметтік қызметтерге тапсырыс беруге арналған. Бұл жөнінде Еңбек және халықты әлеуметтік қорғау министрінің кеңесшісі Айжани Нұрланова брифингте мәлімдеді. «Жүйенің мақсаты – мүгедектігі бар жандардың жеткізушілермен тікелей делдалсыз байланысты қамтамасыз ету. Порталда қызметтерді алу үшін электрондық цифрлық қолтаңба (ЭЦҚ) болуы керек. Порталдың басты артықшылығы - пайдаланушылардың қажеттіліктерін ескере отырып, оңалту техникалық құралдарын таңдау мүмкіндігі. Сондай-ақ, мүгедектігі бар азаматтардың қажетті заттарына тез арада қол жеткізе алады. Бұрын мемлекеттік сатып алу арқылы техникалық құрал-жабдықтармен қамту кезінде азамат 8 айға дейін күтуі керек болса, енді порталға тапсырыс беруден бастап үйге жеткізуге дейінгі уақыт 15 күнге дейін қысқарды. Ең бастысы, мүгедектігі бар азаматтар тауарлар мен қызметтердің қажетті түрін өз бетінше таңдай алады. Аудандарды аралау барысында порталмен жұмыс істеу барысын тексердік. Аймақтарда анықталған мәселелер дер кезінде шешімін тапты. Сондай-ақ, тұрғындар Еңбек және халықты әлеуметтік қорғау вице-министрі Ербол Оспановқа толғандырған сауалдарын тікелей ұялы байланыс арқылы қойып, жауаптарын алды. Мүгедектігі бар азаматтар портал пайда болғалы қажетті заттарының сапасы артқандығын айтты. Қолдауға мұқтаж азаматтардың қажеттілігін қамтамасыз ету, тауар мен қызметтің сапасы – министрдің тікелей бақылауында»,– деді министр кеңесшісі. 

Бүгінгі таңда порталдағы тізілімде 64 қызмет түрі бар. Атап айтқанда, 14-і ымдау тілі маманы, 18 жеке көмекшінің қызметін көрсету, 14 оңалту техникалық құралдары және 18 ұйым санаторий-курорттық емдеу қызметін қамтамасыз етуге арналған. Сонымен қатар, 9 ымдау тілі маманы және 85 жеке көмекші порталда жеке тұлға ретінде тіркелген.