Сайын даланы мекен еткен көңілі дархан қазақ кімге құшақ ашпады десеңші. Тағдырдың айдауымен отанымызға қоныс аударған ұлт өкілдері халқымыздың кеңпейілділігінің арқасында ортамызға сіңісіп кетті. Солардың бірі күрділер бүгінде елімізде тату-тәтті өмір сүруде.

 Таяуда Төлеби ауданында Күрді мәдени орталығының 10 жылдық мерей тойы мен 18 қазан Рухани келісім күніне орай мерекелік кеш өтті.

Шараға облыстық ассамблея төрағасының орынбасары-хатшылық меңгерушісі Ғани Рысбеков, аудан әкімінің орынбасары Сержан Дүйсебаев, аудандық ардагерлер кеңесінің төрағасы Әтірхан Шыңғысбаев, аудандық этно-мәдени қоғамдық ұйымдарының басшылары қатысып, этномәдени бірлестіктің барша өкілдерін мерейтойларымен құттықтады.

Мерекелік кеште ауданның қоғамдық өміріне белсене араласып, халықтар арасындағы ынтымақты нығайтуға, бірліктін сақталуына күш-жігерін жұмсап жүрген азаматтар Түркістан облыстық Қазақстан халқы ассамблеясының және аудан әкімінің алғыс хаттарымен марапатталды.

Айтулы күнді тойлау барысында әртүрлі іс-шаралар ұйымдастырылып, орталық қонақтарына концерттік бағдарлама ұсынылды.

Айта кетейік, 2009 жылы Төлеби ауданында Қазақстанның күрдтер Ассосациясының филиалы тіркелген. Төлеби төрінде бүгінде 1400-ден астам күрді ұлтының өкілі тату-тәтті өмір сүруде.