АФК тәртіптік комитеті футболдан Қазақстан құрамасының капитаны Бауыржан Исламханға қатысты шешім шығарды. Футболшы екі жылға спорттан шеттетілді. Бұл туралы журналист Айдын Қожахмет өзінің Telegram-каналында хабарлады.

Исламхан 16 қыркүйекте Азия Чемпиондар Лигасындағы "Аль-Саддқа" қарсы матчтан кейін допинг-сынақтан өте алмады, содан кейін ол кәсіби деңгейде ойындардан шеттетілді.

Бауыржан Исламхан комитеттің шешімі туралы өз пікірін білдірді:

Азия Чемпиондар лигасындағы 2020 жылғы 18 қыркүйектегі матчтан кейін мен допинг-сынақтан өттім. Оның нәтижесі таңқалдырды, оң болды. Менің сынамамда метилгексанаминнің өте аз концентрацияда табылды, барлығы 90 нг / мл, бұл заттың кездейсоқ қолданылғанын анық көрсетеді.

Мен ешқашан допинг қолданған емеспін және спорт режимін бұзбадым, сондықтан болған жағдайдың бәрі мені таң қалдырады", - деді Исламхан.

Спортшының сөзінше,  метилгексанаминді бодибилдерлер бұлшықет массасын жинау үшін жиі қолданады және футбол үшін мүлдем пайдасыз.

- Бірақ, өкінішке қарай, бұл зат ластанған өнім ретінде спорттық тағамда жиі кездеседі. Дәл осындай жағдай болғанына сенімдімін. 11 қыркүйектен бастап, екі аптаға жуық, Катарда командамен бірге болдым, онда біз қонақүйден шыға алмадық және қатаң карантиндік жағдайда өмір сүрдік, тыйым салынған заттарды айтпағанда, тамақ пен сусын сатып ала алмадық. Мен қонақ үйде бергенді ғана жедім және тек команда дәрігері ұсынған спорттық тағамдарды қолдандым, - деп қосты Бауыржан Исламхан.

Ол 10 сағатқа созылған отырыста АФК өкілдері футболшыны төрт жылға шеттетуді талап еткенін, бірақ соңында төрешілер 2020 жылдың 9 қарашасынан бастап екі жылға шеттету туралы шешім қабылдағанын атап өтті.

- Мен өз ісімді дәлелдеуді жалғастырамын және бұл шешімге міндетті түрде шағым түсіремін. Лозанна сотындағы төрешілер дәлелдерім мен айғақтарымды тыңдайтынына сенімдімін. Қазақстанның барлық футбол жанкүйерлерінен мені қолдауларын сұраймын, себебі сіздердің қолдауларыңыз маған бұрынғыдан да қатты қажет, - деді Бауыржан Исламхан.