Ел Тәуелсіздігінің 30 жылдығы аясында 2021 жылдың 31 тамыз бен 6 қыркүйек аралығында Қарағанды қаласында өрт сөндіру-құтқару спорты бойынша ерлер арасында XIV және әйелдер арасында VII әлем чемпионаты өтті. Әлемдік сайысқа дүниежүзінің 18 елінен 9 ерлер және 5 әйелдер командасы қатысты.

5 қыркүйек күні өрт сөндіру-құтқару спорты бойынша әлем чемпионаты аясында жарыстың соңғы кезеңі өткен болатын. Командалар жауынгерлік өрт сөндіру әрекеттерін толық құраммен орындау жаттығуы бойынша бақ сынады. Өрт сөндіру-құтқару спортының бұл командалық түрі өрт сөндірушілердің іс-қимылдарының ептілігін көрсетеді. 

ҚР ерлер құрама командасы 25,55 секунд нәтижесімен 1 орынды иеленіп, жалпы командалық есепте 4 орынға жайғасты. ҚР құрамасының сапында Шымкент қаласы Төтенше жағдайлар департаментінің спортшысы, жауынгерлік қанат жаюдан екі дүркін әлем чемпионы Вахиджан Қазақбаев өнер көрсетті. Осылайша шымкенттік өрт сөндіруші үш дүркін әлем чемпионы атағына қол жеткізді. 

Вахиджан Қазақбаев – халықаралық дәрежедегі спорт шебері. Жауынгерлік қанат жаюдан 3 дүркін әлем чемпионы. 2011 жылдан бастап өрт сөндіру-құтқару спортымен айналысады. 

Қазақстан Республикасының ұлттық құрамасы сапында 2014 жылдан бері өнер көрсетуде. ҚР чемпионаттарының жеке түрлері бойынша жеңімпазы және жүлдегері.

Оқу мұнарасының 4-ші қабатының терезесіне шабуыл сатысымен көтерілу және 100 метрге кедергілері бар жолақтан өту, сондай-ақ командалық түрлерде 4х100 м өрт эстафетасы және жауынгерлік қанат жаю, халықаралық жарыстар мен әлем чемпионаттарының қатысушысы.