Үшінші мегаполисте "Нұрлы жер" мемлекеттік бағдарламасы қарқынды жүзеге асырылып келеді. Бүгінді аталмыш бағдарлама аясында көптеген шымкенттіктер армандаған баспанаға қол жеткізуде.  Бағдарлама тұрғындарға түрлі бағыт бойынша баспаналы болуға мүмкіндік беруде. Осы ретте Шымкент қаласында 2021 жылдың 1 қыркүйегінен бастап, 15 қыркүйек аралығында «Нұрлы жер» мемлекеттік бағдарламасының «5-20-25» бағыты бойынша жеңілдетілген пайыздық көрсеткіштегі 192 несиелік пәтерге өтінімдер қабылдау конкурсы басталды. Аталған кредиттік бағыттағы  конкурсқа тұрғын үй кезегінде тіркелген барлық азаматтар қатыса алады. Ол үшін Отбасы банкінің «baspana.otbasybank.kz» порталы арқылы онлайн өтінім жіберсе болғаны.

Алғашқы жарна пәтер құнының 20 %-ын, несиенің жылдық мөлшерлемесі 5 %-ды құрайды. Отбасы банк жариялаған ақпаратқа сәйкес, тұрғын үйлер Тұран шағынауданында орналасқан.

Айта кету керек, бұл бағыт бойынша азаматтарға қойылатын басты талап, отбасының соңғы алты ай ішінде еңбек немесе кәсіпкерлік қызметтен табысы әрбір мүшесіне ең төменгі күнкөріс деңгейінің 3,7 еселенген мөлшерінен (2021 жылға – 126 917 теңгеден) аспауы қажет. Зейнетақы аударымдары мен жеке табыс салығы және өзге де міндетті аударымдар табыс көзі ретінде есептелмейді.

Айта кетейік , қазіргі таңда қалада тұрғын үй алу кезегінде 44 мыңнан астам азамат тіркелген. Биыл мыңға жуық тұрғынды сатып алу құқығынсыз арендалық пәтермен қамтамасыз ету көзделген. Жұмыспен қамтылған жастар мен жетім балалар, көп балалы отбасылар мен халықтың әлеуметтік әлсіз тобы дәл осындай мемлекеттік бағдарламаның тиімділігін көреді. Ал бюджеттік ұйымның қызметкерлері 1 миллион теңгелік сертификатқа ие болады. Әрі бастапқы жарнаны өтеудің қайтарымсыз шарапатын сезінеді.