Өңірлерді дамытудың 2020-2025 жылдарға арналған мемлекеттік бағдарламасының негізгі мақсаты -  басқарылатын урбандалу арқылы өңірлердің экономикалық бәсекеге қабілеттілігін арттыру және халықтың тұрмыс сапасын жақсарту болып табылады. Бағдарлама аясында үшінші мегаполисте ауыз толтырып айтарлықтай істер атқарылуда. Әсіресе миллионды қалаға инвестиция тарту бағыты қарқын алған.   Шуақты шаһарға инвестиция салуға француздық бизнесмендер де ниет танытып отыр. 

Бүгін  ҚР Франциядағы елшілігі және Францияның бизнес қауымдастығын біріктіретін «MEDEF International» бірлестігінің ұйымдастырған онлайн-вебинарында Шымкент қаласының әкімі Мұрат Әйтенов қаланың инвестициялық мүмкіндіктерімен таныстырды. Онда Францияның кәсіпкерлер одағы Шымкент қаласы әкімдігімен ынтымақтастықты дамытуға ниетті екендігін білдірді.

Вебинарға ҚР Франциядағы елшісі Жан Ғалиев, Қазақстан-француз іскерлік кеңесінің тең төрағалары Айдан Кәрібжанов пен Ив-Луи Даррикаррер, «Kazakh Invest» АҚ өкілдері қатысты. 

Онлайн жиынға қатысушыларға Шымкент қаласының инвестициялық әлеуеті, жаңа индустриялық алаңдарды одан әрі дамыту жоспарлары, сондай-ақ инвестициялар үшін басым бағыттар таныстырылды.

Қала әкімі Мұрат Әйтенов өз сөзінде шетелдік инвесторлардың қалаға деген үлкен қызығушылығын атап өтіп, француз кәсіпкерлерін машина жасау, цифрландыру, сауда, тамақ өнеркәсібі және туризм секілді салаларға белсенді ынтымақтастық орнатуға шақырды.

Қызу диалог барысында француздықтар болашақтағы серіктестік үшін басты нүктелерді айқындау мақсатында қала басшысына бірқатар сұрақтар қойды. ҚР Франциядағы елшісі Жан Ғалиев француз әріптестерін негізгі қызығушылық тудыратын бағыттарға нұсқап, елдегі инвесторларды қолдау бойынша ақпараттармен бөлісті.

Өз кезегінде, Қазақстан-француз іскерлік кеңесінің тең төрағалары Ив-Луи Даррикаррер мен Айдан Кәрібжанов Француз инвесторларының елімізде бірлескен жобаларды дамытуға ниеті бар екенін атап өтті.

Вебинар соңында қала әкімі Мұрат Әйтенов аталған іс-шараның Қазақстан-Франция қарым-қатынастарын нығайтуға ықпал ететінін ерекше атап өтті. Сонымен бірге, Шымкент қаласында бірлескен инвестициялық жобаларды іске асырудың жаңа перспективаларын белгілеуге дайын екенін жеткізді.