Шымкент - жасыл желегі жайқалған қалаға айналады. Бұл бағыттағы жұмыстарды жүзеге асыру мақсатында 5 жылға арналған іс-шара жоспары бекітілген. Осы орайда қалада «Жасыл қала» ағаш отырғызу іс-шарасы өтті. Игі шараға қала әкімі Мұрат Әйтенов, сонымен бірге бірқатар зиялы қауым өкілдері мен қала тұрғындары қатысты.  Аталған іс-шараны ұйымдастырушы әрі демеушілік көрсетуші – «Мейірім шуағы» қоғамдық қоры болды. 1000 түп ағаш Шымсити шағын ауданында егілді. 

«Мейірім шуағы» қоғамдық қорының жетекшісі Асқар Молдабек: «Жүз жылдығын ойлаған ағаш егеді деген. Іс-шараның өтуіне ат салысып жатқан азаматтардың барлығы елім деген жанашырлар, қала белсенділері. Барлығымыз қаланың гүлденгенін қалаймыз» дейді. 

Шаһар басшысы қала тіршілігіне бейқам қарамайтын белсенді тұрғындарға өз алғысын жеткізді. Бұдан бөлек, елімізде жарияланған төтенше жағдай кезінде қордың атынан медицина мекемесіне ИВЛ аппараттары мен тұрғындарға дәрі-дәрмек, азық-түлік үлестірілгенін де атап өтті.

"Осындай игі бастамаларда үнемі алда жүресіздер. Өзгелерге үлгі болса екен деген тілекпен іс-шараны эстафета ретінде барлық кәсіпкерлерге, қала жанашырларына жолдаймын" -деді Мұрат Әйтенов. 

Жалпы, «Мейірім шуағы» қоғамдық қорының мақсаты көпбалалы, жалғызбасты ана, тұрмысы төмен отбасыларға әлеуметтік және моральды көмек көрсету арқылы олардың қоғамның өзін-өзі қамтыған отбасылар қатарына қосылуына ықпал ету. Бүгінгі таңда балаларды реабилитациялық-түзету, дамыту жұмыстарымен айналысады. Онда қазір тірек-қимыл аппараты бұзылған 120-130 балаға қызмет көрсетіліп жатыр. 

  Айта кетейік, қала әкімдігінің есебі бойынша, қалада бүгінде  6 миллионға жуық жасыл желек бар.  2021-2025 жылдар аралығында «Жасыл белдеу» қалыптастырудың жоспары бекітілген. Жоспар бойынша 6,5 млн түп ағаш егіледі. Нәтижесінде қаладағы ағаш қоры екі есеге артады дейді мамандар.