Президент Қасым-Жомарт Тоқаев халыққа қарнаған былтырғы Жолдауында әлеуметтік маңызы бар азық-түлік тауарларымен өзімізді толық қамтамасыз етуді, миллиондаған ауыл тұрғындарының табысын арттыруды, еңбек өнімділігін екі жарым есе көбейтуді және  агроөнеркәсіп кешені өнімінің экспортын екі есе арттыруды тапсмырыған болатын.  

Осы тапсырмаларды орындау үшін Түркістан облысының ауыл шаруашылығында жаңа әдістер, технологиялар қолданылуда. Солардың бірі бір алқаптан жылына үш рет өнім алу әдісіне қызығушылық білдірген шаруалар көбейіп келеді. Түркістан облысы әкімінің баспасөз қызметінің хабарлауынша,  биыл Ордабасы ауданында осы әдіспен жұмыс істеуге ниетті шаруашылық саны 257-ге жетті. Олар қазіргі таңда 524  гектарға ауыл шаруашылығы дақылдарын егіп, баптауда. Бұл былтырғы көрсеткіштен 3 есеге артық. 

Түркістан облысының әкімі Өмірзақ Шөкеевтің тапсырмасына сәйкес, Ордабасы ауданында ауыл шаруашылық саласын дамыту жүйелі жүзеге асырылуда. Аудан әкімі Нұрбол Тұрашбеков жердің тиімділігін арттыруды, ағын су мәселесінің шешілуін жіті бақылауына алып, түйткілді мәселелердің тарқатылуын ұдайы назарында ұстап келеді. 

Жуырда ордабасылық шаруалар озық технология игілігін көре бастаған дихандардың тыныс-тіршілігімен танысты. Алдымен Қарақұм ауылындағы 15 гектарға тамшылатып суғару әдісін енгізген жеке кәсіпкер Әмзебек Аманжоловпен кездесіп, тәжірибе алмасты. Сондай-ақ, үйіргелік жердің ауласындағы 0,05 га жерге жайғасқан жылыжай жағдайын көрді. Самат Сұлтанов кәсібін «Еңбек» бағдарламасы арқылы алған 555 мың грант қаржысына бастап, екі жылда төрт өнім алып, пайдаға кенелгенін атап өтті. 

Бөген ауыл округіндегі «Анар» шаруа қожалығы жер өңдеуде былтыр айтулы жетістіктерге жеткен. 5,7 га жерге жүгері мен мақта егіп, жүгеріні гектарынан 110 цн, мақтадан гектарынан 30 центнерден өнім алған. Шаруалардың назарына оңтайлы озық техникалар да ұсынылып, қолданылатын тыңайтқыштар туралы ақпараттар берілді. 

Сапар соңы аудан әкімінің орынбасары Қыдырбай Сейітқұлдың, ауыл әкімдерінің қатысуымен өткен семинарға ұласты. Семинар барысында аудандық ауылшаруашылық бөлімінің басшысы Әбілдә Әлібеков баяндама жасап, семинарға қатысушылардың сұрақтарына жауап берді.