Еңбекші ауданында  ҚР Президентінің халыққа  Жолдауын  насихаттау жұмыстары жалғасуда. Тоғыс тұрғын алабында орналасқан №120 мектепте осы аумақта тұратын зиялы қауым өкілдерінің және тұрғындарының қатысуымен кезекті кездесу өтті. 

Кездесуде М.Әуезов  атындағы  Оңтүстік Қазақстан университетінің проректоры, доцент Сәкен Мәжінбеков Жолдаудың  негізгі бағыттары  бойынша  баяндама  жасады. 

-Ауыл шаруашылығымен айналысатын аймақтар,  оның ішінде мал шаруашылығымен айналысатындар экономикалық дамуда бірқатар қиыншылықтарға тап болып отыр. Қазақстан Республикасының барлық аймақтарын теңгерімді түрде дамытуға негізделмей, елдің экономикасының артуы және халықтың әл-ауқатының жоғарылауы сөз жүзінде қалып қоятын іргелі мәселелерге айналып келеді. Осы өткір мәселе Мемлекет басшысы 

Қ. Тоқаевтың Қазақстан халқына Жолдауында көтерілуі өзекті де өміршең болып табылады. Бұл бағыт бойынша Президент, «Жем-шөп дайындауға қажетті жер көлемін кеңейту, егіс алқабына әр жылы әртүрлі дақыл егу талабын сақтау үшін тиісті бақылауды күшейту, ғарыштық мониторинг және қашықтан зондтау мүмкіндігін кеңінен қолдану, жайылымдық жерді тиімді пайдалану маңыздылығын атап өтті, — деді С. Мәжінбеков.

Cондай-ақ Оңтүстік арнайы еркін  экономикалық аймағының басқарушы өкілдері және аймақ кәсіпорындарының қызметкерлері де жиын өткізді. Жиында М.Әуезов атындағы Оңтүстік Қазақстан университетінің саясаттану кафедрасының оқытушысы Жамелов Бауыржан Алтайұлы баяндама жасады.  

Мемлекетіміздің әлеуметтік-экономикалық және қоғамдық-саяси дамуының барлық аспектілері қамтылып, жер қойнауын тиімді пайдалану, жекешелендіру, АӨК (аграрлық өнеркәсіп кешені) проблемаларын шешу, экономика мен мемлекеттік секторды цифрландыру процесін сапалы ретке келтіру, денсаулық сақтау мен білім беру, өңірлерді дамыту, еңбек нарығы, саяси жаңғыру және адам құқығын қорғау, қоғамдағы бірлік пен келісім сияқты еліміздің   дамуына қатысты аса маңызды мәселелерге назар аударылғаннын айтып өтті.