Шетелдіктер мен еңбек мигранттары үшін еліміздегі алғашқы медициналық-санитарлық көмек ұйымдарына еркін тіркелу тәртібі өзгерді. Бұл туралы өңірлік коммуникациялар орталығында өткен брифингте «Әлеуметтік медициналық сақтандыру қоры» клммерциялық емес акционерлік қоғамынің Түркістан облысы бойынша филиалы бөлімінің басшысы Лаура Сапарбекова мәлімдеді. 

Жылдағы дәстүр бойынша елімізде 15 қыркүйекте басталатын емдеу мекемелеріне тіркелу науқаны алдында журналистермен жүздескен бөлім басшысының айтуынша, шетелдіктер мен еңбек мигранттарының медициналық сақтандыру шарттары болуы тиіс.  

Қазақстан аумағына уақытша келген шетелдіктер мен олардың отбасы мүшелері ҚР «Міндетті әлеуметтік медициналық сақтандыру туралы» Заңының 3-бабы, 2-тармағы бойынша МӘМС жүйесінде қазақстандық азаматтармен бірдей құқықтарды пайдаланады және міндеттер атқарады. 

– Электрондық үкіметтің www.egov.kz веб-порталы арқылы бекіту үшін «Денсаулық сақтау» бөлімінде «Медициналық-санитариялық алғашқы көмек көрсететін медициналық ұйымға тіркелу» қызметін таңдау қажет. Халықтың жекелеген санаттары үшін емханаға бекіту еркін нысандағы өтінішпен және жеке басын куәландыратын құжатпен тікелей жүгінген кезде жүргізіледі. Бұл әдіс заң бойынша бала кезінен мүгедек болып тағайындалған зейнеткерлерге, мүгедектерге, қамқоршыларға, патронат тәрбиенушілеріне, колонияларда жазасын өтеп жатқан сотталушыларға, студенттерге, мерзімді әскери қызметшілерге, шет мемлекеттерде туылған балаларға және сенімхат бойынша тіркеуді жүзеге асыратын адамдарға ғана қолжетімді, – деді Лаура Ділдәбекқызы. 

Денсаулық сақтау министрлігінің «Республикалық электрондық денсаулық сақтау орталығы» ШЖҚ РМК Түркістан облысы бойынша филиалының өкілі Ұлықбек Оңалбаевтың айтуынша, тіркелуге қолжетімді емханалардың тізімімен қордың www.fms.kz сайтына кіріп, «Емхананы таңдау» бөлімінде танысуға болады. Науқан кезінде МСАК ұйымына бекітіле отырып, азаматтар медициналық көмекті 2022 жылдың 1 қаңтарынан бастап ала бастайды. Яғни, жыл соңына дейін азаматтарға бұрын тіркелген емханада қызмет көрсетіледі.