Бүгінгі таңда Сарыағаш ауданында екпе егу жұмыстары қарқынды. Вакцинациялау жұмыстары 14 егу пунктері мен жылжымалы кешендерде жүргізілуде. Ауданда екпе салдыруы тиіс 101 700 адам толығымен вакцинаның 1-ші компонентін қабылдады. Бұл туралы Сарыағаш ауданы әкімдігінің баспасөз қызметі хабарлады. 

Аудан бойынша екпе салдыруы тиіс азаматтар арасында вакцинаның бірінші компонентін соңғы болып қабылдаған Көктерек кентінің тұрғыны Бекжан Атамбаев болды. 5 баланың әкесі Б.Атамбаев бүгінгі таңда көлік жүргізуші болып жұмыс істейді. Ол бұл қадамға өзі мен отбасының қауіпсіздігін ойлағандықтан барғанын айтады. Сонымен қатар, өзіміздің денсаулығымыз үшін екпе алу керек деп есептейді.

Айта кетсек, пандемия басталғалы жалпы аудан бойынша 176 061 ПТР сынамасы алынып, індеттің 596 жағдайы тіркелді. Оның 146-сы симптом байқалмаған. Бүгінде эпидемиологиялық ахуал матрицасы бойынша Сарыағаш ауданы «жасыл» аймақта. Мамандандырылған инфекциялық стационарларда барлығы 250 орын бар, 170 төсек орын бос. Инфекциялық стационарда 80 науқас емделуде. Аудандық ауруханада 146 оттегі аппараты мен 2 айға жететін дәрі-дәрмек қоры жасақталған.

Жақындары мен өз денсаулықтарына бей жай қарамайтын аудан тұрғындары бүгінгі таңда белсенділік танытып, толығымен екпе алды.