Эхинококкоз – алдын алуға болатын қауіпті дерт. Эхинококкоз – адам мен жануарларда кездесетін, эхинококк деп аталатын таспа құрт тудыратын қауіпті паразитарлық ауру.

Негізгі тасымалдаушысы – ит, қасқыр, түлкі сияқты жыртқыш жануарлар. Аралық иелері – қой, ешкі, сиыр, түйе, сонымен қатар адам да осы дертке шалдығуы мүмкін.

Жұғу жолдары: эхинококк адам ағзасына мына жолдар арқылы түседі:

• Итпен ойнағаннан кейін қолды жумай, тамақтану;

• Ластанған көкөніс пен жеміс-жидектерді пайдаланғанда;

• Мал сойғанда санитарлық ережелерді сақтамау кезінде;

• Итке малдың ішкі ағзаларын (бауыр, өкпе) шикілей бергенде.

Белгілері: ауру бастапқы кезеңінде белгілерсіз өтуі мүмкін. Киста үлкейген кезде бауыр мен өкпе аймағында ауырсыну, әлсіздік, тез шаршау, тыныс алудың қиындауы, аллергиялық реакциялар байқалады.

Алдын алу шаралары: эхинококкоздың алдын алу үшін әрбір азамат мына қарапайым ережелерді сақтауы тиіс:

1. Иттерге уақтылы құртқа қарсы дәрі беру (дегельминтизация).

2. Итке малдың ішкі ағзаларын шикі күйінде бермеу.

3. Қолды әрдайым мұқият жуу – әсіресе итпен ойнағаннан кейін және тамақ алдында.

4. Жеміс-жидек пен көкөністі таза сумен жуу.

5. Мал сою барысында ветеринарлық-санитарлық ережелерді сақтау.

6. Балаларға жеке гигиенаны үйрету.

Эхинококкоз – қауіпті болғанымен, оның алдын алу қарапайым санитарлық-гигиеналық ережелерді сақтау арқылы мүмкін. Әрбір отбасы өз денсаулығы мен қоғамның амандығы үшін жауапты екенін ұмытпағаны жөн.

К.Адырбаева,

Абай ауданы СЭЭБ басшысы